عاجل
Foto

محمد الشواف يكتب: العشرة السمان في تشجيع منتخب مصر التعبان

1- شجع وما تشغلش بالك بالأداء مش وقت نصدر الإحباط للعيبة.. هما أساسا يجيبوا إحباط لقارة بس احنا أحسن منهم ودي بلدنا ودي بطولة على أرضنا وده للأسف منتخبنا فشجع بدون حسابات وفزلكة الكويرة.

2- دعا كتير .. ادعوا بكثافة في الخمس فروض وصلاة الجمعة وفي الكنايس يوم الأحد ويوم الجمعة ولو حد دعوته مستجابة يزود.. احنا مش هينفع معانا بالوضع ده غير دعاء ١٠٦ مليون مصري يعني اللي في الداخل مش كفاية .. المغتربين في الخارج ادعوا من عندكم.

3- ما تقفشوش ع النني وتعلقوا على أداءه وهو موجود بقوة قانون الأواني المستطرقة فبلاش نركز معاه .. كده كده جنبه طارق حامد وحش خط النص.. تخاف لما تلاقي النني جنبه غزال.. غير كده ولا تركز معاه مش هتعرفه أصلا بعد ما حلق شعره ٤.

4- مروان محسن يضيع زي ما هو عاوز .. مش مستحمل ما تتفرجش.. حباية الضغط والسكر وانبوبة أكسجين وتعامل مع مل الفرص .. احنا من امتى مروان بيجيب لا مؤاخذة .. مروان في المنتخب عشان ليه قرايب مهمييين مش أكتر.. وكوكا لو نزل ضاعف جرعة المهدئات.

5- وانت رايح الاستاد تعاون .. تفتيش اتفتش.. الحكاية مش محتاجة نتفزلك وأصل معاملة وحشة وأصل الأمن مضيقها.. دي رجالة هتقعد شهر بدون نوم ولا أجازات عشان البطولة تمر بأمان وسط كم مرعب من التهديدات والمخاوف من استغلال البطولة لضرب استقرار مصر .. فلو مش قد المسئولية خليك في بيتك واتفرج بفانلتك وبوكسرك ع البطولة بالاريال.

6- في الشهر ده لا في أهلي ولا زمالك ولا مين جاب جون ولا مين شال المنتخب ولا مين غلط .. جنش واقف جون يبقى كلنا جنش.. وليد سليمان لعب يبقى كلنا وليد سليمان .. وكوكا أو مروان محسن لعبوا يبقى كلنا خالد بوطيب.. الانتماء هنا لمصر ثم مصر ثم مصر.

7- صلاح نجم المنتخب مش محتاجة فكاكة فلما ياخد اهتمام زيادة ما تحزقش لتنزلك بواسير.. ميسي في الأرجنتين بيمشي مدربين وكريستيانو في البرتغال بيحط التشكيل.. صلاح مهما عمل عارف حدوده .. ويكفي انك عندك ٦٠ وكالة أجنبية ووكالة البلح بتنقل كل يوم خبر عن صلاح .. يعني صيتك هيوصل للعالم بيه .

8- أعزائي السرسجية البنات الأفارقة مش للشقط ولا بياكل معاهم رفعة المكنة الصيني.. فالشبحنة دي استنى ع العيد الكبير اتشقلب براحتك .. لا عاوزين تحرش ولا رخامة لا على المغاربة ولا التوانسة ولا اخواتنا من باقي جماهير الدول المشاركة.

9- وانت في الاستاد قدامك ٩٠ دقيقة لو مش قد إنك من أول ثانية لآخر ثانية في كل الماتشات تهتف وتشجع وتحمس اللاعيبة حتى لو مش بيحسوا ما تروحش سيب عتاولة التشجيع هما عارفين يولعوا المدرجات إزاي.

10- أعضاء اتحاد الكرة دول ابتلاء فما تركزش معاهم بعد أي فوز.. واجيري ده راجل بركة ماشية معاه بالدعاء اللي في بند رقم ٢ فما تعملوش حسابكم عليهم .. رهانك على حبك لبلدك .. حافظ على نظافة شوارعنا .. ما تمشوش من الاستاد إلا وهو نضيف وبيلمع زي ما دخلتوه.. ما تخربش ولا تكسر لأنك أولا ده ماتش على أرضك وأي تخريب هيبقى على حسابك وثانيا لأن المدرجات متراقبة بالكاميرات فهتتنفخ.




أخبار الأهلى

أخبار الزمالك